By: Jim Lloyd Dongiapon
Napalgan sa mga awtoridad ang patay ngalawas sa usa ka bata sayo sa kabuntagon niining Sabado, Marso 4, sa lungsod sa Claveria sa Misamis Oriental,
Ang biktima giila isip ang 10-anyos nga si Sofhea Irenver Bual, nga gikatahong nawala sa iyang amahan nga si Kenneth Bual, human wala kini makauli sa ilang panimalay gikan sa Minantang Elementary School niadtong Miyerkules, Marso 1.
Gikaingong ulahi siyang nakit-an nga nagbaktas duol sa usa ka pinyahan. Nagbalay-balay na ang iyang pamilya sa pagpangita kaniya, apan sila wala nagmalampuson.
Human nga pormal siyang gikataho nga nawala, ang lokal nga panggamhanan sa Claveria, ang Municipal Disaster Risk Reduction and Management Office (MDRRMO), Claveria Municipal Police Station (MPS), ug ang Armed Forces of the Philippines (AFP) naglusad og search and rescue operation palibot sa ilang lungsod.
Tulo ka adlaw ang milabay, sa sayong kabuntagon sa Sabado, Marso 4, napalgan sa mga awtoridad ang usa ka sako nga gihumol sa usa ka sapa ug gidat-ogan og mga dagkong bato sa Sitio Banban sa Barangay Poblacion. Sulod niini ang patayng lawas sa usa ka batang babaye, nga kinaunyaan nakompirma nga si Sofhea.
Sa usa ka post sa Facebook, gipadayag sa iyang amahan ang iyang kalagot ngadto sa tawong gituohang mipatay kaniya.
“Sa naghimo nga demonyo (niini), Ginoo ra’y bahala sa imo. Grabe imong gihimo sa bata nga wala unta’y sala. Halos di na nako mailhan akong anak…Ako nang isalig tanan sa Ginoo. Unta mahayan nimo tanan nimo gibuhat sa akong anak,” suwat ni Kenneth.
Gipasalamatan usab niya ang lokal nga panggamhanan sa Claveria ug ang mga rescuer sa ilang tabang sa pagpangita sa iyang anak.
Samtang, gi-anunsyo sa Claveria MPS nga ang 28-anyos nga si Ariel Bayud Limas, ang suspek sa pagpatay kang Sophea, boluntaryong mitahan kanila sa wala pa nag-udto ning Sabado.
Matud sa kapulisan, miangkon si Limas nga kaduha niyang gilugos ang biktima ayha niya kini gipatay.
Human sa mangilngig nga panghitabo, mag-atubang og kasong murder ang suspek.
