By Jim Lloyd Dongiapon
Gikumpirma sa National Grid Corporation of the Philippines (NGCP) sa ilang press release karong adlawa, Oktubre 25, nga natumba ang ilang Baloi-Aurora 138-kilovolt Transmission Line pasado alas 4:50 sa hapon kagahapon, Oktubre 24, ug nagkinahanglan kini og Manual Load Dropping (MLD) sa nahibiling linya aron malikayan ang overloading.
Nahimo kining hinungdan sa pagkawala sa kuryente sa tibuok Zamboanga Peninsula, partikular na sa Zamboanga del Norte (lakip ang Dipolog City ug Dapitan City), Zamboanga del Sur (lakip ang Pagadian City ug Zamboanga City), Zamboanga Sibugay, ang tibuok bahin sa Misamis Occidental, ug sa pipila ka mga dapit sa Lanao del Norte.
Ang pagkatumba sa ilang transmission line gumikan sa pagpamomba sa Tower No. 8 sa may Sitio Isidro, Barangay Bagumbayan, Kauswagan, Lanao del Norte, nga miresulta sa pagkahugno sa torre.
Gikumpirma sab sa mga mirespodeng awtoridad nga improvised explosive device (IED) ang gigamit sa mga sad-an sa pagpatumba sa transmission tower. Nakaplagan usab nila ang usa ka wala pa mailhing lalaki nga dunay mga makamatay nga mga samad. Apan, dili pa klaro kung duna kini kalambigitan sa pagpamomba.
Kasamtangan nang ginaimbestigahan ang maong insidente segun sa NCGP.
Sa laing bahin, nakigkoordinar na ang NGCP ngadto sa Armed Forces of the Philippines (AFP) ug sa mga local law enforcer alang sa pagbantay sa lugar samtang ginapahigayon ang mga pag-ayo.
Gipahimug-at sa kompanya nga ang mga pagpamomba, tumong lamang nga pabug-aton ang mga palas-anon sa publiko, kinsa kinahanglang mag-antos sa pagkawala sa kuryente sa mga higayong dunay pagpamomba sa mga torre.
Subli usab silang nagpahimangno nga ang bisan unsa mang kadudahang kalihokan sulod o ubay sa power transmission corridor nga mamahimong makabalda sa power transmission mamahimong masilotan sa balaod, ug duna kini multa nga hangtod ₱200,000 o 12 ka tuig nga pagkapriso, o pareho.
Nanawagan sab sa publiko ang NGCP nga i-asot kanila ang mga kadudahang kalihokan o mga kalapasan sa right-of-way pinaagi sa ilang mga hotline: 0917-TIPNGCP (8476427); 0918-TIPNGCP (8476427); o sa ilang email address, tipngcp@ngcp.ph.