By Jim Lloyd Dongiapon
Matuman na gayud ang damgo sa mga Davaoeño ug Samaleño sa usa ka tulay nga magdugtong sa duha nilang dakbayan human ang upat ka dekada nga paghulat karong opisyal nang gisugdan karong adlawa, Oktubre 27, ang pagtukod sa Samal Island-Davao City Connector Bridge (SIDC) project.
Gipahigayon ang groundbreaking ceremony sa gipanag-iyahan sa Damosa Land Properties nga Lanang Beach Club sa Lanang, Dakbayan sa Davao pasado alas 10:30 kaganihang buntag.
Gipasiugdahan kini nila Presidente Ferdinand “Bongbong” Marcos Jr., Bise Presidente “Inday” Sara Duterte, Ambassador of the People’s Republic of China to the Philippines Huang Xilian, Department of Public Works and Highways (DPWH) Secretary Manuel Bonoan. Davao City Mayor Sebastian “Baste” Duterte ug Island Garden City of Samal (IGACOS) Mayor Al David Uy.
Gilayong gipangunahan ni Marcos Jr. ang seremonyal nga paglubong sa time capsule, diin sulod niini ang blueprint sa proyekto, usa ka mantalaan, ug mga sinsilyo, aron project’s blueprint, a newspaper, and coins, isip timailhan sa opisyal nga pagsugod sa pagtukod sa taytayan. Human niini, gipresenta usab sa mga opisyal ang diorama ug ang perspective sa maong tulay.
Ang SIDC dunay kinatibuk-ang gitas-ong 3.98 kilometros, nga magdugtong sa Samal Circumferential Road in sa Barangay Limao, IGACOS ngadto sa R. Castillo–Daang Maharlika junction sa Dakbayan sa Davao.
Gibanabanaang anaa sa P23.039 bilyones ang kinatibuk-ang gastos niini, ug pondohan sa concession loan nga gihatag sa gobyerno sa Tsina ang dakong bahin niini.
Sa iyang pamulong, gihulagway sa Presidente ang proyekto isip “testamento sa lig-on ug padayong nagalambo nga pundasyon sa bilateral nga relasyon” tali sa Pilipinas ug Tsina. Gipasalamatan usab niya ang gobyerno sa Tsina tungod nahimo kining “masaligan nga kauban” sa infrastructure development program sa nasud.
Dugang niya, sa higayong matapos ang proyekto sa tuig 2027, motabang kini sa “pagpalambo sa ekonomikong potensyal sa Dakbayan sa Davao ug sa Island Garden City of Samal, ingon man pagpausbaw sa mga residente niini nga makakuha og trabaho, edukasyon, ug uban pang mga serbisyo ([it will help] develop the economic potential of Davao City and the Island Garden City of Samal, as well as enhance its residents’ access to employment, education, and other services).”
Gipasidunggan usab sa Punong Ehekutibo sila kanhi Presidente Rodrigo Duterte ug kanhi DPWH Secretary ug incumbent Senator Mark Villar sa pagsugod sa proyekto niadtong tuig 2018. Nagalaum usab siya nga siya ang “maswerte” nga moabli sa taytayan sa higayong mahuman kini.
Unang giduso ang proyekto niadto pang tuig 1979 ni kanhi Davao del Norte Assemblyman Rodolfo del Rosario, apan miatubang kini og pipila ka mga hagit sa katuigan, lakip na ang pagpondo, road right of way, isyu sa feasibility, wala pagprayoridad sa gobyerno, ug mga Writ of Kalikasan.
Bisan pa man gisugdan na ang pagtukod sa SIDC, padayon gihapon ang panawagan sa pipila ka mga sektor nga ilinya og usab ang tulay. Kini naglakip sa pamilyangLucas-Rodriguez family, tag-iya sa mga maapektuhang Paradise Island ug Costa Marina resorts, Dominic & Sons Realty and Development Corporation, ug mga environmentalist.
Lakip sa mga gihatag nila nga rason mao ang potensyal nga dili na mabalik nga kadaot ngadto sa Paradise Reef sa Pakiputan Strait ug ang kakulang sa konsultasyon sa gobyerno ngadto sa mga maapektuhang partido.
Sa pikas bahin, gipahimug-at sa DPWH nga nagpahigayon sila og tukmang mga konsultasyon ug ang kasamtangang alignment ang dunay labing gamay nga kadaot sa kinaiyahan, subay sa gibuhat nga pagtuon sa consultant nga Ove Arup, nga nakabase sa Hong Kong.
(Courtesy: Robinson Niñal, Jr. / Philippine News Agency)