By Christian Dee
MAYNILA – Naglabas na ng opisyal na pahayag ang Bise Presidente ng bansa at Department of Education (DepEd) Secretary na si Sara Duterte ukol sa pagre-rebrand umano ng Batas Militar.
Sinabi ni Duterte sa pahayag na, alam niya ang kahalagahan ng Martial Law at EDSA Revolution sa kasaysayan ng bansa.
“Bilang bata, hindi ko mabilang ang mga yellow pages sa directory ng telepono na ginupit ko para gawing confetti ng mga Yellow Friday Movement demonstrations sa pangunguna ni Soledad Duterte, ang aking yumaong lola, sa Davao City. Mukhang mas marami tayong ambag sa mga pagkilos laban sa Martial Law kaysa sa ilang maiingay na anti-Marcos ngayon,” aniya.
Giit nito na bilang kalihim ng edukasyon, wala sa kaniyang mandato ang pagsira sa integridad ng kasaysayan.
“At ang Department of Education — na kasalukuyang abala sa mga programang naglalayong maiangat ang kalidad ng basic education sa Pilipinas — ay walang panahon para sa historical revisionism na pilit na iginigiit ng ilang mga anti-Marcos groups,” dagddag pa niya.
“Una nang nasabi ng DepEd Spokesperson na hindi totoo ang sinasabing rebranding ng ating kasaysayan. At inuulit ko ang sinabi ni Atty. Michael Poa: hindi totoo ang rebranding,” saad ng anak ng dating pangulong Rodrigo Roa Duterte.
Sa huli, nais ni Duterte na mag-ingat ang publiko sa mga pagkilos laban sa Martial Law gamit ang ahensya.
