By: Margaret Padilla
––
Pinayuhan si Pangulong Ferdinand Marcos Jr. na gawing optional o boluntaryo ang paggamit ng face masks sa mga lugar outdoor, ayon sa pahayag na inilabas ng Malacañang noong Miyerkules.
Binigyan umano ng pangulo ang panukala ng kanyang “verbal approval” sa kanyang pakikipag-usap sa telepono kay Interior Secretary Benhur Abalos, ayon sa PhilStar News, ngunit nilinaw ni Press Secretary Trixie Cruz-Angeles na hindi pa rin ito opisyal na patakaran.
Sinabi ni Angeles na iminungkahi ng Inter-agency Task Force for the Management of Emerging Infectious Diseases: “paluwagin ang mandato sa pagsusuot ng maskara at gawing boluntaryo ang pagsusuot ng maskara sa labas sa buong bansa.”
“This will be optional in open spaces or uncrowded outdoor areas with good ventilation, provided that senior citizens and those who are immunocompromised are highly encouraged to continue wearing masks,” ayon kay Angeles.
Inaasahan niya na ang isang pilot test ng ganap na pag-aalis ng mandato ng face masks ay maaaring maganap sa huling quarter ng taon kung mas mapapabuti ang pagpapatupad ng bansa ng mga COVID-19 boosters.
Samantala, kailangang gawing pormal ang rekomendasyon sa isang executive order, ang paglilinaw ni Maria Rosario Vergeire, ang officer in charge ng Department of Health sa isang press briefing.
“This has to be placed in this kind of legal instrument before it becomes a policy. What we are doing right now is initially informing the public,” aniya.
Sinabi ni Vergeire na ang mga lokasyon na ituturing na mga open space ay sasailalim pa rin sa talakayan, at ang mga lokal na pamahalaan ay maaaring atasan sa pagtukoy batay sa anumang mga patnubay na ibinigay.
Binanggit niya na ang rekomendasyon ng IATF na tanggalin ang pagsuot ng face masks ay suportado ng “tiwala sa ating mga bakuna,” at iniugnay niya sa pagpapanatili ng antas ng mga kaso ng COVID-19 na “stable at manageable.”