Nakasinati og power blackout ang mga lugar sa Visayas human naigo sa kilat hinungdan naputol ang dagan sa kuryente sa Colon-Cebu 138kV Lines 1, 2 ug 3 ug ang Colon-Quiot 138kV Line nga gipanag-iya sa National Grid Corporations of the Philippines
Mao kini ang inisyal nga nakita sa NGCP sa ilang imbistigasyon sa dihang nakasinati og power blackout ang Cebu, Leyte-Samar ug Bohol pag 11:56 sa gabie, Agosto 20, 2021.
Matud pa sa NGCP nga hinay-hinay nabalik ang kuryente sa ilang mga apektadong kustomer nga nagsugod sa Cebu pag 12:52 sa buntag ug ang katapusang feeder nga nabalik sa Visayas grid mao ang Leyte-Samar pag 5:46 sa buntag ug ang Bohol, pag 5:48 sa buntag, Agosto 21, 2021.
Matud pa ni NGCP-Visayas spokesperson Betty Martinez nga aduna silay lighting arrester apan usahay makalusot kini og maigo ang ilang transmission lines.
Samtang nabalik na usab ang kuryente sa tibuok franchise area sa Visayan Electric.
Ang prangkisa sa VECO naglungkib kini sa siyudad sa Cebu, Mandaue, Talisay ug Naga ug ang upat ka munisipyo sa Metro Cebu nga mao ang Liloan, Consolacion, Minglanilla ug San Fernando.
Si Cebu City Councilor Joel Garganera, ang tsirman sa committee on power nagkanayon nga ang mga hospitals sa siyudad lakip na ang Cebu City Medical Center adunay backup generator, diin ang blackout nakahimo og gamay nga kahasul apan nabalik ra dayon ang kuryente human sa pipila ka minutos.
Ang KEPCO SPC Power Corporation gihimakak ang mga balita sa online nga nasunog ang ilang planta nga maoy hinungdan sa power blackout.
Matud pa Cebu-based power plant nga dili kani tinuod og usa ka fake news. Nag-awhag usa sila sa katawhan nga dili magpataka og sabwag sa mga balita nga dili tinuod.