By Jim Lloyd Dongiapon
––
Gi-anunsyo na sa Darul-Ifta ‘, o ang Islamic advisory council sa Bangsamoro Autonomous Region in Muslim Mindanao (BARMM) karong adlawa, Hunyo 30, ang opisyal nga petsa sa Eidul-Adha o Feast of Sacrifice, usa sa duha ka opisyal nga holiday sa Islam.
Pinaagi sa awtoridad nga gitugyan kaniya, gideklara ni Bangsamoro Darul-Ifta ‘ Executive Director Grand Mufti Abuhuraira A. Udasan, nga magsugod ang pista karong Hulyo 9, Sabado.
Ang Hulyo 9 usab ang ika-10 adlaw sa July 9 Dhu al-Hijjah, nga mao ang ika-12 ug ulahing bulan sa Islamic calendar.
Subay sa Republic Act No. 9849, gitakda ang Eidul-Adha isip usa ka regular non-working holiday.
Ang Eidul-Adha nagatapos sa panawduaw o Hajj paingon sa Mecca, ug ginahandom niini ang kaandam ni Ibrahim nga ihalad ang iyang anak nga si Ismail isip pagtuman sa mga sugo ni Allah SWT (Subhanahu wa ta’ala). Apan, sa dihang patyon na ni Ibrahim ang iyang anak, usa ka tingog gikan sa langit ang mipugong kaniya ug naghatag si Allah og usa ka lalaking karnero aron mao ang ihalad inay ang iyang anak.
Matag Eidul-Adha, ginasubli sa mga Muslim ang pagsunod niya kang Allah Muslims pinaagi sa paghalad og baka o lalaking karnero. Kaonon sa pamilya ang ikatulong bahin niini, samtang ihatag nila ngadto sa ilang mga higala ug paryente ang laing ikatulong bahin, ug ang nahibiling ikatulong bahin ang ihatag nila ngadto sa mga dili adunahan.
Usa ka lain pang tradisyon atol sa pista ang paghatag og karidad pinaagi sa kwarta, sinina o pagkaon ngadto sa mga kabus.