By Christian Dee
Gitapos na niadtong Miyerkules, Nobyembre 2, ang search and retrieval operations alang sa mga nagpabiling nangawalang mga biktima sa pagdahili sa yuta hinungdan sa Severe Tropical Storm “Paeng” (international name “Nalgae”) sa Barangay Kusiong, Datu Odin Sinsuat sa Maguindanao del Norte.
Segun ni Datu Jaffer Sinsuat, kapitan sa Barangay Kusiong, diin nahitabo ang pagdahili sa uyta, gitapos na sa incident post nga gipangulohan sa 6th Infantry Division sa Philippine Army ang operasyon ug gitunol na niini ang mga responsibilidad ngadto sa lokal nga panggamhanan sa Datu Odin Sinsuat.
Miingon usab sya nga gawas na lang kung magpagula og direktiba ang lokal nga panggamhanan, dili na makapadayon pa ang operasyon.
Dugang pa niini, namahayag siya nga motutok na sa rehabilitasyon sa mga naapektuhang lugar ingon man sa relief efforts alang sa mga biktima ang lokal nga panggamhanan ug mga awtoridad.
Migahi na ang yuta og lapok nga milamoy sa komunidad, nga nagpalisod sa pagpaningkamot sa mga rescuer nga makalot ug makuha ang mga patayng lawas, dugang niya.
Naghugpong ang mga rescuer gikan sa lain-laing ahensya sa gobyerno ug sa mga local government unit alang sa pagtabang sa pagkuha sa mga lawas nga natabunan sa pagdahili sa yuta.
Ayha pa man gitapos ang operasyon, nagdagkot og mga kandila og naghalad og pag-ampo ang mga rescuer alang sa mga biktima nga nangamatay sa maong dapit.
Sa ulahing ihap, 23 ka mga patayng lawas ang nakuha na, ug tulo ka bata ang nagpabiling ginapangita.
Karong Huwebes, Nobyembre 3, gikataho sa National Disaster Risk Reduction and Management Council (NDRRMC) nga 44 ang kinatibuk-ang ihap sa mga namatay sa tibuok lungsod sa Datu Odin Sinsuat.
Kapin usa ka gatos nga mga balay ang nangaguba human nga midahili ang usa ka bahin sa Mount Minandar ug gitabunan og baga nga lapok, mga bato, ug mga punoan, ang tibuok komunidad.
Gibutyag ni Sinsuat disclosed ibalhin sa laing lugar ang mga pamilyang naapektuhan sa pagdahili sa yuta, apan wala na siya nihatag pa og dugang detalya kalabot sa maong butang.
Mohatag og hinabang ang gobyerno ngadto sa mga pamilya nga nagubaan og balay o sa mga namatyan og mga sakop sa pamilya tungod sa bagyo.