By Jim Lloyd Dongiapon
––
Ang Sultan Kudarat na lang ang wala pa nakatala og bisan usa ka kaso sa African Swine Fever (ASF) virus sa tibuok SOCCSKSARGEN (South Cotabato, Cotabato, Sultan Kudarat, Sarangani, General Santos City) Region sukad nga unang namatikdan kini sa Department of Agriculture (DA) niadtong Hulyo 2019.
Aron mapabilin ang ASF-free status sa probinsya, nagpagula si Mayor Joseph George Lechonsito sa Dakbayan sa Tacurong og Executive Order (EO) number 28 series of 2022 , kon “Executive Order Adopting, Localizing, and Implementing Provincial Ordinance no. 50 Series of 2021, Otherwise Known as ‘African Swine Fever Prevention Ordinance of Sultan Kudarat’.”
Gidili sa maong EO ang pagsulod sa mga baboy, karneng baboy, ug mga produkto sa karneng baboy ngadto sa dakbayan.
Gimugna usab niini ang City African Swine Fever Task Force (CAFT) alang sa pagpatuman sa mga probisyon niini, ug gitahasan niini ang Office for the Veterinary Services nga magsilbi isip nag-unang tigpatumang ahensya.
Gimuntar usab sa Office for the Veterinary Services, kauban ang Philippine National Police (PNP) ug Armed Forces of the Philippines (AFP), sa mga entry ug exit points sa dakbayan aron i-monitor ang pagsulod sa mga baboy, karne sa baboy, ug mga produkto niini nga nagaagi sa ilang lokalidad.
Sa laing bahin, gina-regulate sa Section 5 sa maong kamanduan ang trannsportasyon sa mga nasangpit nga mga produkto gikan sa mga ASF-free nga dapit sa Pilipinas. Tugutan lamang ang mga delivery vehicle nga muagi sa dakbayan kung makatuman kini sa gitakdang documentary veterinary quarantine requirements.
Multahan og ₱3,000 alang sa unang kalapasan ug ₱5,000 sa ikaduha ug mga mosunod na kalapasan ang mga mosupak sa EO.
Ang mga gipangkumpiskang baboy, karneng baboy, mga produkto niini, ug semilya sa baboy ang ipanglabay pinaagi sa pagsunog o sa uban pang sanitary methods uban sa paggiya sa Provincial o City Veterinary Office, sa pakiglambigit sa DA, Bureau of Animal Industry (BAI), ug uban pang angay nga ahensya sa gobyerno.