By Jim Lloyd Dongiapon
Mitaliwan si Jerry Kasim, usa ka tadhang swimming coach, gumikan gi-atake sa kasingkasing samtang nakigtigi sa swimming portion sa Alveo Ironman 70.3 Davao triathlon kagahapon, Marso 26. Gikasubo pag-ayo sa swimming community sa Davao city ang iyang kamatayon. Siya nag-edad 49 anyos.
Gikaingon ni Sanita Kasim Soreny, iyang manghod nga babaye ug kanhi miyembro sa national dragon boat team kinsa nakabase na karon sa United Kingdom, nga nahingangha ang ilang pamilya sa iyang kalit nga kamatayon sanglit wala sila nasayod sa mga posibleng kondisyon sa kasingkasing nga iyang naangkon.
Matud ni Soreny, daling gidala iyang kinamagulangang igsuon sa Southern Philippines Medical Center (SPMC), apan wala na nagmalampuson ang pagpaningkamot nga ma-revive siya.
Isip pagtuman sa mga tradisyon sa paglubong sa mga Muslim, gihatod na siya sa iyang ulahing kapahulayang dapit ning hapuna lamang.
Gikumpirma sa mga organizer sa Ironman Davao ang kamatayon sa usa sa mga partisipante niini human nga natapos ang lumba kagahapon.
“We are deeply saddened to confirm the death of a race participant at IRONMAN 70.3 Davao. The athlete required medical attention during the swim portion of the race and was transported to a nearby hospital where they were treated,” segun sa Alveo Ironman 70.3 sa ilang Facebook post Dominggo sa gabii.
Wala na mihatag pa ang mga organizer og dugang impormasyon kalabot sa pagtaliwan ni Kasim sa hangyo na sab sa iyang pamilya. did not provide more information regarding Kasim’s passing at the family’s request.
Mipaabot na sab og pahasubo ang City Government of Davao ngadto sa nagbangotang pamilya.
Si Coach Jerry, nga mao’y pagkaila sa iya sa iyang mga higala og mga trainee, usa ka empleyado sa disbursement section sa Department of Education (DepED) Davao City.
Sa tibuok katuigan niya sa high school ug kolehiyo, nakigtigi siya sa pipila ka Palarong Pambansa ug National Prisaa Games isip swimmer alang sa dakbayan ug sa rehiyon. Nagsugod siya nga magtrabaho isip coach ug trainer sa mga age-group swimmer bag-o niya gitukod ang iyang kaugalingong “Jerry Aquatics Swimming Team.”
Nabilin niya iyang duha ka anak, nga parehas mga swimmer sab. Ang iyang kinamagulangang anak nga lalaki nagasilbi karong coach alang sa DMMA College Southern Philippines (DCSP) swimming team.