By Jim Lloyd Dongiapon
Natapos karong adlawa, Oktubre 21, ang una sa mga serye sa pangpublikong konsultasyon alang sa pagpasa sa Bangsamoro Transition Authority (BTA) Parliament Bill No. 29, kon ang Bangsamoro Electoral Code, nga gipahighayon sa Crowne Plaza Manila Galleria sa Quezon City.
Laraw sa mga konsultasyon nga tabangan ang panggamhanang Bangsamoro sa pagtukod sa structural, organizational, ug procedural guidelines alang sa unang regional elections niini, nga mahitabo sa tuig 2025.
Ang mga partisipante gikan sa mga civil society group ug election watchdogs, lakip angLegal Network for Truthful Elections (LENTE), National Citizen’s Movement for Free Elections (NAMFREL), Parish Pastoral Council for Responsible Voting (PPCRV), Ateneo School of Government (ASOG), Philippine Center for Islam and Democracy (PCID), Bangsamoro Free Election Movement (BFEM), Women Engage in Action on UNSCR 1E25 (WeAct), Integrated Bar of the Philippines (IBP), Tanggapang Panligal ng Katutubong Pilipino (PANLIPI), Catholic Bishop Conference of the Philippines (CBCP), ug Mindanao Organization for Social and Economic Progress, Inc. (MOSEP) mitambong sa konsultasyon karong adlawa.
Samtang, ang Commission on Elections (COMELEC), Philippine National Police (PNP), ug ang mga magbabalaod sa Bangsamoro gikan sa Kamara de Representantes, ug uban pang mga resource speaker, ang misalmot sa unang adlaw sa mga panagpulong niadtong Huwebes, Oktubre 20.
Gipaambit ni Atty. Sha Elijah B. Dumama-Alba, Chairperson sa Committee on Rules of the Bangsamoro Parliament, nga misaad si Chief Minister Ahod Ebrahim kang Presidente Ferdinand “Bongbong” Marcos, Jr. nga mapasa na ang Bangsamoro Electoral Code sa unang quarter sa tuig 2023.
Segun usab niya, magpahigayon ang BTA Parliament Disyembre karong tuiga og mga konsultasyon sa mga lalawigan sa Basilan, Sulu, Tawi-Tawi, Maguindanao del Norte, Maguindanao del Sur, Lanao Del Sur, ug Special Geographic Areas sa North Cotabato.
“The conduct of public consultations as part of the legislative requirement is important as it engenders transparency and accountability in the process of legislation and provides space for stakeholders and the public in general to participate (Ang pagpahigayon sa mga pangpublikong konsultasyon kabahin sa lehislatibong panginahanglanon mahinungdanon sanglit kini nagamugna og kasihagan ug pagkaresponsable sa proseso sa lehislasyon ug maghatag kini og espasyo alang sa mga hingtungdan ug sa publiko sa kinatibuk-an aron sila makasalmot),” dugang niya.
Sa samang higayon, si Presidential Adviser on Peace, Reconciliation, and Unity Secretary Carlito Galvez Jr., kinsa mitambong usab sa konsultasyon karong adlawa, mipadayag nga siya kompyansa nga mapasar sa tukmang panahon ang electoral code sa rehiyon, dungan sa pag-ingon nga nagpakita og “moral nga pagsalig” sa pagtuman sa ilang saad ngadto sa Presidente.
Ang ginadusong balaodnon sa piniliay sa rehiyon usa sa pito (7) ka kalagdaan nga gikinahanglang ipasa sa panggamhanang Bangsamoro sulod sa transition period.
Gilauman nga molingkod sa katungdanan ang unang regular nga Bangsamoro Parliament sa Hunyo 30, 2025, human sa piniliay nga gitakda sa Mayo 12, 2025.
Magpahigayon unta ang Bangsamoro og piniliay niadtong Mayo karong tuiga, apan gi-aprubahan sa nasudnong panggamhanan niadtong tuig 2021 ang pag-oktaba niini, gumikan sa COVID-19 pandemic ug sa kawad-on sa Bangsamoro Electoral Code.