By Jim Lloyd Dongiapon
––
Taliwala sa nagkadaghang mga natalang kaso sa COVID-19 sa Dakbayan sa Zamboanga, gi-ablihan na og balik sa City Health Office (Oficina de Salud o CHO) ang mega isolation facility sa Barangay Talisayan aron modugang sa Pasonaca isolation facility.
Kaniadtong Lunes, Agosto 22, miabot na sa kritikal na lebel ang Pasonaca facility human kini nakaadmitar na og 70 ka mga pasyente sa COVID-1D, segun sa pamalita ni City Health Officer Dr. Dulce Miravite atol sa Emergency Operations Center (EOC) meeting.
Dugang ni Miravite, 14 ka mga pasyente ang kasamtangang ginatambalan sa Talisayan facility, ug mihangyo siya og dugang seguridad ug uban pang mga rekisitos aron masiguro nga hapsay ang dagan sa operasyon niini.
Matud pa sa samang pamalita, tulo ka mga balay tambalanan sa dakbayan ang nagagamit na og mechanical ventilators kaniadtong Agosto 22.
Niadtong Dominggo, Agosto 21, 17 ka bag-ong mga kaso ug 38 ka bag-ong mga nangaayo ang gikatala sa Dakbayan sa Zamboanga. Nagdala kini sa kinatibuk-ang ihap sa mga aktibong kaso ngadto sa 376, nga adunay 28,650 nga nangaayo na ug 1,271 ka mga nakalas.
Gikan Agosto 1 hangtod Agosto 15, anaa sa 18 hangtod 63 ka mga bag-ong kaso ang matala matag adlaw, nga nagdala sa kinatibuk-ang ihap sa mga aktibong kaso hangtod sa kapin 400.
Gipahayag ni Miravite nga bisan pa man niini, nagsugod na sa mga milabayng adlaw ang pagkunhod sa ihap sa mga kaso nga matala matag adlaw ug nagalaum kini nga magpadayon ang paubos nga trend aron mapugngan ang dugang pagsaka sa mga kaso.
Gipahimug-at usab niya nga anaa pa gihapon ang hulga sa COVID-19, ug giawhag niya ang mga Zamboangueño nga magpadayon sa pagtuman sa minimum health requirements ug uban pang preventive measures.
Kahinumduman nga gipaubos sa Inter-agency Task Force for the Management of Emerging Infectious Diseases (IATF-EID) ang Dakbayan sa Zamboanga sa Alert Level 1, ang pinakaubos sa lima ka alert levels. Magpabilin kini hangtod Miyerkules, Agosto 31, gawas na lang kung lugwayan pa kini.