By Jim Lloyd Dongiapon
––
Natala sa Zamboanga City Health Office (CHO) ang 52 ka bag-ong kaso sa dengue niadong milabayng semana gikan Hunyo 12 to 18, nga nagdala sa kinatibuk-ang ihap sa mga kaso sa dengue sa dakbayan ngadto sa kinatibuk-ang 2,628.
Sa laing bahin, wala’y natalang nangamatay sa samang semana.
Subay sa datos sa Zamboanga CHO, sa kinatibuk-ang mga kaso, 1,916 ang adunay warning signs samtang 641 ang nangataptan sa dengue ug wala nagpakita og warning signs.
Kadaghanan sa mga kaso ang gikan sa 0-9 age group, nga adunay 51 porsyento o 1,344 ka mga kaso, nga naghimo kanila isip pinakaapektadong age group. Gisundan kini sa 10-19 age group nga dunay 31 porsyento o 827 ka mga kaso.
Ang rate sa dengue incidence, o kung unsa kapaspas mukatag ang sakit, kasa 100,000 residente sa Zamboanga City ang anaa sa 293.24. Ang mga barangay nga dunay pinakataas nga incidence rate kada 10,000 ka populasyon mao ang Divisoria, Mercedes, Boalan, Lanzones, ug Sta. Barbara.
Ang clustering sa mga kaso, kon pagkatala og tulo o labaw pa nga mga kaso sa milabay nga upat ka sagunsong semana, ang nakita sa Barangays Putik, Tumaga, ug Sta. Maria.
Samtang, gikonsidera ang Barangay Tetuan isip hotspot area, diin nakita ang pagsaka sa ihap sa clustering sa mga kaso sa milabayng duha ka semana.
Hugot karong gina-monitor ang mga Barangay sa San Roque, Zambowood, Campo Islam, Zone IV, Sinunuc, Salaan, Bolong, Vitali, ug Lumayang gumikan sa padayong pagsaka sa mga kaso sa dengue sa maong mga dapit.
Aron mapugngan ang padayong pagsaka sa ihap sa mga kaso, nagpadayon gihapon ang dengue prevention and control activties sa City Government of Zamboanga, sama sa pagpalihok sa komunidad aron ipahigayon ang 4S (Search and Destroy, Self-Protection Measures, Seek Early Consultation, Say “Yes” to Fogging only during Outbreaks) matag semana, fogging, ug etymological surveys sa mga dapit nga dunay tag-as nga incidence rates.
Nagdeklara niadtong milabayng bulan ang Dakbayan sa Zamboanga og dengue outbreak human sila makatala og lapas 2,000 ka kaso sa dengue gikan Enero hangtod Mayo karong tuiga.
Nagpabilin gihapon ang outbreak status sa tibuok dakbayan sa pagkakaron