By Jim Lloyd Dongiapon
Sa pagsaulog sa Valentine’s Day karong adlawa, Pebrero 14, kapin 110 ka magtiayon sa Lake Sebu, South Cotabato ang nagbinayloay sa ilang mga panaad sa Kasalan ng Bayan nga gipahigayon sa Municipal Gymnasium sa Barangay Poblacion.
Gi-organisa kini sa Municipal Civil Registrar Office nga gipangulohan sa labaw niining si Garcia Alam, LPT, ug gitambongan sab kini sa ilang alkalde nga si Floro Gandam.
Gipahigayon ang mass civil wedding uban sa kompirmasyon ug balidasyon sa Tribal Marriage subay sa Presidential Decree No. 1414, nga usa ka dekreto nga nanalipod sa mga kostumbre, tradisyon, pagtuo ug interes sa nasudnong minorya, Act No. 3753 (Law on Registry of Civil Status), Executive Order No. 209 (Family Code of the Philippines) Article 33, ug Republic Act No. 8371 (Indigenous Peoples Rights Act of 1997).
Ang Kasalan ng Bayan sa Lake Sebu kabahin sa kasaulogan sa ika-33 nga Civil Registration Month nga dunay tema nga, “PSA@10: Providing Efficient and Effective Civil Registration and Vital Statistics Through Digital Transformation”.
Si Sangguniang Bayan Private Secretary I Larry Alon, LPT, ang nag-host sa seremonya, ug mitambong ug gisaksihan sab kini sa principal sponsors, uban sa presensya nila South Cotabato Provincial Statistics Officer Jilmar F. Grecia, ug Statistics Specialist II Em Gayosa.
Gipaabot sab sa lokal nga panggamhanan sa Lake Sebu ang ilang pasalamat ngadto nila Vice Mayor Bing Pabe ug Naneth Cabangbang alang sa mga bulak, MCR Staff, Information Staff ug mga wedding singer nga sila Nelly Ukom ug Carmela Yang- Alam.