Jim Lloyd Dongiapon
––
Gi-anunsyo ni Davao City Mayor Sara-Duterte atol sa iyang ulahing Valedictory and State of the City Address (SOCA) karong Huwebes, Marso 17, 2022 nga ang usa ka libo nga yunit sa High-Priority Bus System (HPBS) langkuban og 300 ka electric bus.
Magsugod ang bidding process alang niini sa mga muabutay na bulan, sumala kang Duterte-Carpio.
Gibutyag usab ni Duterte-Carpio nga ang loan processing alang sa nahisgutang transport modernization project ang nagapadayon pa, ug nakiglambigit na ang City Government of Davao ug ang Department of Transportation alang sa pagpatuman niini. Nadawat na usab nila ang mga bid alang sa kontrata sa civil works alang sa pagtukod sa mga terminal ug depot.
Gipili ang High-Priority Bus System niadtong tuig 2017 isip paagi sa modernong pangpublikong transportasyon sa Dakbayan sa Davao. Tumong niini nga tubagon ang paghuot sa dagan sa trapiko gumikan sa kadaghan sa mga public utility jeepney ug aron usab mahatagan og tuhay nga commuting experience ang mag Dabawenyo.
Gisugat kini og kritisismo gikan sa mga transport group niadtong una kining gi-anunsyo tungod “anti-poor” kini, apan giklaro mismo sa lokal nga panggamhanan nga ang mga apektadong driver ug operator ang mahilakip sa bag-ong transport system sa dakbayan, ug mahatagan sila og hinabang-pinansyal ug training atol sa transition period.
Ang HPBS gilaumang mamahimong fully operational sa ikatulong quarter sa tuig 2023.