By Frances Pio
–
Isang abogado na umano’y sangkot sa hit-and-run incident sa Bacolod noong nakaraang linggo kung saan napatay ang isang senior citizen ay hindi sumipot sa kanyang pakikipagpulong sa pamilya ng biktima nitong Lunes, Hunyo 20.
Sinabi ni Police Major Ritchie Gohee, pinuno ng Police Station 4, na ipinaalam ng abogado, sa pamamagitan ng isang kinatawan, sa pulisya na hindi siya pinayagang bumiyahe ng kanyang doktor dahil sa hypertension.
Sinabi ni Gohee na ang pamilya ng biktima, sa pamamagitan ng kanilang legal counsel, ay direktang nakikipag-ugnayan sa kampo ng abogado. Wala raw siyang ideya kung may nakatakda pang pagkikita sa pagitan nila.
Namatay sa ospital ang biktimang si Aquilino Cambelisa Jr., 63, ng Barangay Mandalagan, matapos mabundol ng sedan na minamaneho ng abogadong tumakas umano na nasaksihan ng ilang rescuers na rumesponde sa pinangyarihan sa La Salle Ave., Barangay Villamonte noong Hunyo 16.
Sinabi ni Gohee na isang rescuer na nakuhanan ang rescue operation, kabilang ang tumakas na abogado, ay handang magsagawa ng affidavit bilang saksi sa insidente.
Sinabi ni Gohee na handa silang tulungan ang pamilya ng biktima sakaling sasampahan nila ng kaso ang abogado.