By: April Therese Tan
Gumikan sa kabangis ni Bagyong Odette, usa ka amahan nawagtangan og kaluha, asawa ug igsoon human nahugno ang bungbung sa usa ka bodega ngadto sa ilang pinuy-anan sa barangay Maguikay, Mandaue City, Cebu.
Si Mayor Jonas Cortes inubanan sa mga konsehal sa siyudad nibisita ni Harold Bantigue nga naghilak nga nisaysay sa iyang kasinatian human nakabsan sa kinabuhi ang iyang kaluha nga si Eloiza Dionne ug Elaiza Dianne, iyang asawa nga si Leah Clarus ug igsoon nga si Emilita.
Si Cortes ug mga konsehal nihatag og hinabang pinansyal sa amahan ug nisaad nga ipa imbistigar ang maong panghitabo kung wala ba nakalapas ang tag-iya sa bodega sa pagpalapad niini.
Nisaad usab ang mayor nga hatagan og scholarship ang nahabilin pa nga anak ni Bantigue.
Si Cortes nibisita usab sa haya sa Enoc family kinsa nakabsan usab sa ilang kinabuhi sa dihang nikuso-kuso si bagyong Odette.
Ang firewall nahugno og didto nitugpa sa panimalay ni Jose Winnie Enoc, ang amahan, iyang anak nga si Arnold ug apo nga si Aira Mae.-(April Therese Tan)