By Jim Lloyd Dongiapon
––
Gipusil-patay sa wala pa mailhing suspetsadoang Barangay Kapitan sa Mt. Diwata, Monkayo, Davao de Oro alas 8:32 kagabii, Hunyo 26, sa Purok 15, Amakan Village, Brgy. Poblacion sa samang lungsod.
Giila ni Monkayo Municipal Police Station OIC Police Major (PMaj.) Jesser Vagilidad IV ang biktima nga si Pedro Samillano, Jr., 62 anyos.
Subay sa inisyal nga imbestigasyon, nagamaneho sa iyang Toyota Innova samtang pauli sa iyang panimalay si Samillano gikan sa Poblacion proper sa Monkayo. Samtang ginaparada niini ang iyang sakyanan atubangan sa iyang panimalay, ang suspek, kinsa sakay sa usa ka motorsiklo, ang miduol ug mipusil kaniya sa ulo sa makadaghang higayon.
Gidala pa siya sa mga miresponde gikan sa Municipal Disaster Risk Reduction and Management Office (MDRRMO) ngadto sa Davao de Oro Provincial Hospital, apan gikelara kining dead on arrival sa attending physician.
Upat ka basyo sa .45 kalibreng pistola ang nakuha gikan sa gipanghitabuan sa krimen.
Dili pa tin-aw sa karon ang nag-unang motibo sa krimen, kung duna ba kini kalambigitan sa politika, nanukad sa personal nga pagdumot, o dili.
Padayon pang nagapahigayon og malawmong imbestigasyon sa insidente ang Monkayo MPS aron matino ang motibo sa krimen ug aron mailhan ang suspek niini.