By: April Therese Tan
Si Cebu Governor Gwendolyn Garcia niluwat og bag-ong Executive Order aron sa pag kontrol sa pagpalit og lana sa mga istasyunan sa gasolina sa tibuok probinsiya.
Sa iyang EO nga giluwatan kaganihang adlawa, Disyembre 21, 2021 nagkanayon nga ang pagkuha sa gasolina ug diesel diresto lang ngadto sa tangke sa sakyanan ug limitado lang kini sa kapasidad sa matag sakyanan.
Ang EO nga mo epekto sugod karong 12:01 sa kadlawon sa Disyembre 22, 2021 nagkanayon nga ang tanang tawo nga mopalit og gasolina ug diesel sa mga otorisadong istasyunan sa gasolina gidili nga magtubil sa baril ug uban pang mga sudlanan sa lana.
Dugang pa sa EO ni Garcia nga kadtong lang mga otorisadong mopalit og lana gamit ang baril ug uban pang sudlanan ang tugtan mopalit sama sa mga ospital, hotel, bangko ug ubang pang importante ug mga establisimento nga nag serbisyo sa publiko, apan kinahanglan magpakita sila og ebidensiya sa ilang negosyo sama sa business permits.
Dugang pa sa maong EO nga ang lana alang sa mga residential generator limitado lang kini ngadto sa napulo ka litro og ang mopalit nagdala og prowiba nga siya ang tag-iya pinaagi sa pagpakita sa hulagway o resibo sa pagpalit sa maong generator.
“Gas stations and other authorized dealers of gasoline and diesel fuel are prohibited from increasing their prices over and above the existing rates, “ dugang pa sa maong EO.-(April Therese Tan)