By Jim Lloyd Dongiapon
––
Mideklara ang Davao City Health Office (CHO) og diarrhea outbreak sa Toril District human makatala og dul-an 50 ka mga kaso acute gastroenteritis kon kalibanga gikan sa 12 ka mga barangay.
Sa pakighinabi niya sa city-owned radio station, gi-ila ni CHO Head Dr. Ashley Lopez ang mga apektadong barangay tungod sa outbreak, nga mao ang: Bato, Toril Proper, Crossing Bayabas, Lubogan, Mulig, Daliaon Plantation, Tungkalan, Daliao North, Daliao South, Lizada Fish Port, Lizada Kurbada, ug Binugao.
Dugang niya, sa mga natalang kaso, anaa sa six months old ang pinakabata, samtang 40 anyos ang pinakatigulang.
Miingon usab siya nga wala’y natalang namatay tungod sa kalibanga sukad Hulyo 18.
Nakig-alayon na ang CHO sa Lingap Para sa Mahirap Program sa dakbayan alang sa mga apektadong residente nga manginahanglan og tabang medikal.
Samtang, gina-imbestigahan pa nila ang hinungdan sa outbreak sa maong dapit, ug nakigkoordinar na sila sa local water concessionaire nga Davao City Water District (DCWD) aron matubag ang maong isyu.
Isip usa sa ilang precautionary measures, temporary usa nga gipahunong sa buhatan ang pagpamaligya og street food sa maong dapit. Ipailawom usab sa seminar ug orientation ang mga street food vendor kalabot sa saktong food handling aron malikayan ang pagkuyanap sa diarrhea.
Matud ni Lopez, ginasuta pa nila ang posibilidad nga ang street foods, partikular na ang tapioca, mao’y hinungdan sa outbreak gawas sa kontaminadong tubig.
Niadtong Biyernes, Hulyo 15, gikataho sa mga residente sa Toril District nga nakasinati sila og loose bowel movement (LBM) human miinom og tubig gikan sa gripo.
Nagpagawas og pamahayag ang DCWD niadtong Dominggo, Hulyo 17, nga luwas imnon ang ilang tubig human nga makadawat sila og mga taho kalabot sa talagsaong kataas sa mga kaso sa LBM sa Matina ug Toril.
“DCWD immediately double-checked all of its water sources in the affected areas. DCWD reports that all chlorination facilities are working 100% with chlorine residuals within the normal limits (0.8 ppm). This residual is enough to inactivate bacteria causing waterborne diseases such as diarrhea (Daling gisusi sa DCWD ang tanang tinubdan niini sa tubig sa mga apektadong dapit. Gikataho sa DCWS nga ang tanang chlorination facilities niini ang 100 porsyento nga nagaandar, ug ang chlorine residuals niini anaa sa normal nga mga limitasyon (0.8 ppm). Kini nga residual igo aron mapatay ang bacteria nga hinungdan sa mga sakit dala sa tubig sama sa kalibanga),” sumala sa DCWD.
Isip dugang pag-amping, mirekomenda ngadto sa mga konsumante ang DCWD nga pabukalan usa ang tubig bag-o kini imnon.
Sa laing bahin, gitambagan sa City Government of Davao ang mga Davaoeño nga gawas sa pagpabukal sa tubig, mamahimo usab silang mokonsumo og purified o nakabotelyang tubig. Gipahimangnoan usab sa LGU ang tanan nga permi hugasan ang ilang mga kamot gamit ang sabon ug tubig aron malikayan ang impeksyon.