By Jim Lloyd Dongiapon
––
Gikumpirma sa pamilya Mangacop nag nakapiyansa na si Dr. Marvin Rey Andrew Pepino, ang suspek sa pagpusil kang Amierkhan Mangacop, alang sa kasong homicide sa Regional Trial Court (RTC) Branch 16, City Hall of Justice, sayo kaganihang buntag, Hulyo 21, tunong sa iyang ika-32 nga adlawng natawhan.
Kini nahitabo usa ka adlaw human nga nagpagula og resolusyon ang Office of the City Prosecutor (OCP) nga nagpaubos sa kaso gikan sa murder, nga girekomenda sa National Bureau of Investigation (NBI) XI, ngadto sa homicide.
Wala’y nakita nga “probable cause” ang OCP aron pasang-atan og kasong murder ang sad-an subay sa mga gisumiteng ebidensya kanila, ilabi na ang CCTV footage nga nakakuha sa insidente.
Giduso nila Assistant City Prosecutors Armand D. Tirol, Daniel M. Fernandez, ug Irene Joy P. Tala ang resolusyon. Mihimo sa rekomendasyon si Prosecutor Sharuddin Roberto Sencio, ug gi-aprubahan kini ni OCP Chief Jhopee S. Avanceña.
Nag-atubang usab og lain pang kaso si Pepino tungod sa paglapas sa Section 31 sa Republic Act (RA) 10591 kon Comprehensive Firearms and Ammunition Regulation Act, nga nagadili sa pagbitbit og lisensyadong armas gawas sa pinuy-anan nga wala’y permit.
Mirekomenda ang OCP og ₱180,000 nga piyansa – ₱120,000 alang sa homicide ug ₱60,000 alang sa paglapas sa RA 10591.
Nagahisgot na karon ang pamilya Mangacop kalabot sa ilang mga mosunod nga lakang human nga “opisyal nga nakalingkawas sa pagpatay” si Pepino.
Mihangyo na sila og hold departure order (HDO) kagahapon, Hulyo 20, batok kang Pepino sanglit nabatian nila nga ang suspek posibleng maka-ikyas sa prosekusyon pinaagi sa pagbiyahe gawas sa nasud tungod adunahan kini.
Naglibog na usab sila kung paunsa nila handumon ang ika-20 nga adlawng natawhan unta ni Amier karon umaabot nga Sabado, Hulyo 23.
19 ka adlaw na ang milabay dihang gipusil-patay si Amier ni Pepino, kinsa usa ka doktor sa Camp Sgt. Quintin M. Merecido Hospital sa Police Regional Office (PRO)-Davao, human sa init nga kagubot sa Lugar Cafe and Bar.