By Jim Lloyd Dongiapon
Gipusil patay ang usa ka konsehal pasado udto karong Lunes, Oktubre 24, sa may National Highway sa Barangay Kurungan, Datu Montawal (Pagagawan), Maguindanao del Sur.
Nailhan ang biktima nga si Datu Montawal Councilor Mubarac Abubakar, o mas nailhan sa iyang mga ginsakupan isip si “Kagawad Moby.”
Subay sa inisyal nga imbestigasyon sa Datu Montawal Municipal Police Station (MPS), sakay si Kagawad Moby sa iyang pula nga Mitsubishi Strada pick-up sa dihang giduolan siya sa mga wa mailhi pang mga tig-atake ug gipusil sila sa makapilang higayon.
Dali siyang gidala ngadto sa Deseret Surgimed Hospital sa silingang lungsod sa Kabacan, North Cotabato, apan gideklara siyang dead on arrival sa mga nag-atimang doktor.
Gidala ang iyang minatay sa ilang panimalay sa Barangay Kayaga sa Kabacan. Gilubong siya karong hapon subay na usab sa tradisyon sa Islam.
Nanawagan og hustisya karon ang iyang pamilya tungod sa iyang brutal ug wala’y hinungdang kamatayon.
Sa laing bahin, nagapahigayon na ang Datu Montawal MPS ug mas lawom nga imbestigasyon aron matino ang mga motibo sa pagpaluyo sa krimen. Gilusad sab ang usa ka hot pursuit operation batok sa mga suspek.
Si Abubakar midaog sa piniliay alang sa Sangguniang Bayan niadtong Mayo 9 karong tuiga nga dunay 12,487 ka boto, o 70.82 porsyento, ug nahimo siyang First Councilor sa Datu Montawal. Nagsilbi usab siya nga chairperson sa Committee on Peace and Order sa konseho sa ilang lungsod.