By Jim Lloyd Dongiapon
Hingpit nang mubalik ang mga personal nga kasadyaan sa tinuig nga Kadayawan Festival sa Dakbayan sa Davao sa Agosto 15 hangtod 21 karong tuiga human ang duha ka tuig nga virtual nga kasaulugan niini.
Nahimo kining opisyal human nga gipagula sa lokal nga panggamhanan sa Dakbayan sa Davao ang Executive Order Number 21 series of 2022, nga nagamugna sa executive committee (Execom) ug sub-committees alang sa 2022 Kadayawan sa Davao Festival.
Ang chairperson of the Execom mao ang City Mayor, kinsa, sa panahon sa kasaulugan si Sebastian “Baste” Duterte. Ang City Administrator ang magsilbing chairperson niini kung wala siya.
Ang Pangulo sa Davao City Chamber of Commerce and Industry, Incorporated ang magsilbi isip co-chairperson.
Ang ubang mga miyembro sa Execom langkuban sa: chairperson sa Committee of on Tourism and Beautification, ug incumbent Indigenous Peoples Mandatory Representatives sa Sangguniang Panlungsod; ang officers-in-charge (OICs) sa City Budget Office, Museo Dabawenyo, ug City Tourism Operations Office (CTOO);ug ang Assistant City Administrator for Operations.
Ang CTOO ang modumala sa Festival Management.
Gilantaw kini sa mga Davaoeño isip usa ka maayong kalambuan sanglit kini ang unang higayon sulod sa tulo ka tuig nga ipahigayon ang mga in-person nga kalihokan atol sa kapistahan.
Niadto pang 2019 ang ulahing higayon kanus-a adunay mga susamang kasadyaan.
Virtual nga gisaulog niadtong tuig 2020 ug 2021 ang Kadayawan gumikan sa mga risgo nga dala sa nagapadayong COVID-19 pandemic.
Bisan pa man sa kagamay sa mga ihap sa natalang mga kaso sa COVID-19 sa mga milabay nga semana, ginapahimangnuan gihapon sa lokal nga panggamhanan ang tanang musalmot sa mga kasadyaan nga magsuot gihapon og face masks isip proteksyon batok sa kagaw.
Ginasaulog sa mga Davaoeño ang Kadayawan sukad tuig 1988 isip pamaagi sa pagpasalamat sa abundang ani ug isip higayon alang sa mga hudyaka. Gikonsidera usab kini isip usa sa mga dagkong tourism event sa nasud.
Ang kapistahan nakadani og daghanang mga turista matag tuig, nga nagapadako usab sa kita sa dakbayan.