By Jim Lloyd Dongiapon
Dili na kinahanglan pang mobiyahe sa mga Zamboangueño paingon sa uban pang mga siyudad sa Mindanao matilawan lang ang Starbucks sanglit gi-ablihan na sa American multinational coffeehouse chain ang ilang labing unang outlet sa Zamboanga City karong buntaga, Pebrero 21.
Gi-anunsyo sab sa Starbucks Philippines, pinaagi sa ilang official Facebook page, ang ilang pag-abli sa Asia’s Latin City.
“Hola! Taqui ya el Starbucks na Ciudad de Zamboanga (Kumusta! Ni-a na gayud ang Starbucks dinhi sa Dakbayan sa Zamboanga),” gipaambit sa Starbucks Philippines sa ilang post.
Gihinangop ni Mayor John Dalipe sa Zamboanga City ang Starbucks ug gipasalamatan ang tigdumala sa kompanya sa ilang pagsalig ug pamuhunan sa ilang dakbayan.
Nagatuo usab si Dalipe nga ang pag-abli sa unang branch sa maong coffee-giant sa ilang rehiyon ang makatabang sa pag-uswag sa ekonomiya dili lamang sa ilang dakbayan kondili sa tibuok Zamboanga Peninsula sab.
Iya sab gibutyag nga ang Starbucks mi-hire og 18 ka Zamboangueño aron mamahimong kabahin sa ilang crew ug gipangbansay nila kini sa Cebu aron nga mapasalig ang hapsay nga serbisyo ug usa ka makalingaw nga kasinatian.
Nahimutang ang Starbucks Zamboanga sa ground level sa SM City Mindpro, La Purisima Street corner Campaner Street, Barangay Zone III Poblacion, Zamboanga City, ug abli kini sa pagserbisyo adlaw-adlaw gikan alas 8:00 sa buntag hangtod alas 10:00 sa gabii.