Ang kagamhanan sa Lapu-Lapu City magsugod na og bakuna sa ilang 12 ngadto 17 anyos sugod ugmang adlawa, Nobyembre 3, 2021.
Matud pa ni Mayor Junard Chan sa iyang Facebook post nga ang mga bata sa susamang edad nga residente sa siyudad mao lang una ang bakunahan sa COVID-19 vaccines.
Nagkanayon ang mayor nga ilang gi istrikto ang maong vaccination rollout diin “dili pwede ang walk-ins”.
“Kinahanglan gayud nga anaay madawat nga text sa skedule una mo adto sa vaccination site, maong palihug lang sa pag paabot sa inyong madawat nga text confirmation. Strictly walay walk-ins ug scheduling basis lang ang pasudlon sa Hoopsdome ugma,” matud pa ni Chan.
Matud pa sa mayor nga base sa guidelines, usa lang ka ginikanan o guardian ang pwede makakuyog sa bata sulod sa vaccination center.
Gipahinumduman usab sa mayor ang ginikanan o guardian nga magdala og school identification sa bata,
orihinal nga birth certificate sa bata nga gi isyu sa Philippine Statistics Authority o kung walay orihinal nga birth certificate, pwede dad-on ang orihinal nga baptismal certificate o school record sa bata nga naay pangalan sa ginikanan o barangay clearance nga gipirmahan sa kapitan diin magpamatuod nga kaila siya sa gonikan sa bata o balido nga ID sa ginikanan nga residente sila sa siyudad.
Samtang ang guardian nga mokuyog sa bata inug bakuna, kinahanglan magdala og affidavit of guardianship ug balido nga ID diin magpakita nga siya nagpuyo sa siyudad.
Gipahimamgnuan usab sa mayor ang ginikanan o guardian nga magdala og medical clearance nga gi isyu sa doktor kung ang bata nga bakunahan adunay gihambing sa lawas o comorbidities. (By: April Therese Tan)