By: April Therese Tan
Walay hunong ang lokal nga kagamhanan sa Mandaue City, Cebu sa paghatag og ayuda alang sa mga residente nga nakaaguman og dakong kadaot sa ilang panimalay human gigusbat og taman-taman ni bagyong Odette ug ang 27 ka barangay niini.
Si Mayor Jonas Cortes ning bag-o lang nagsugod na sa pag apod-apod sa 27 ka heavy duty generator sets alang sa 27 ka barangay sa siyudad.
Ang mga generator sets gamiton sa water system sa matag barangay ingon man aron naay charging station ang tagsa tagsa ka mga barangay aron dili na maglisud ang katawhan pangita og lugar asa sila maka charged sa ilang mga cellphone labi na dili tanang barangay aduna nay kuryente.
Gawas sa generator sets, ang siyudad mohatag usab og satellite phones ngadto sa ilang 27 ka barangay labi na karon nga lisud pa gayud ang komunikasyon labi na nangaguba pa ang mga kable ug cellsites sa mga kumpaniya sa telekumunikasyon.
Ingon man ang 557 ka pamilya nga biktima sa bagyo sa barangay Cambaro diin nagusbat ang ilang panimalay gipanghatagan na og 25 ka kilo nga bugas og napulo ka litro nga tubig.
Nakadawat usab sa susamang ayuda ang 585 ka pamilya sa Barangay Cubacub.
Nanghinaot si Mayor Cortes sa tanang lumulupyo sa siyudad sa pagsabot nga unahon ang paghatag sa maong ayuda sa kadtong mga pamilya diin wala na gyud pinuy-anan.
Apan gipaniguro sa mayor nga ang tanang biktima sa bagyo makadawat ra sa susamang ayuda sa umaabot pa nga mga adlaw.-(April Therese Tan)