Gihinganlan sa Alyansa sa mga Mamumuo sa Sugbo-Kilusang Mayo Uno (AMA Sugbo-KMU) isip usa ka “EndoKing” si Presidente Rodrigo Duterte samtang ang maong grupo moapil sa pag marka uban sa katawhang Pilipino sa katapusang State of the Nation Address (SONA) niini.
Bisan pa man sa presensiya sa kapulisan sa nagkadaiyang lugar sa Cebu City, ang multisectoral nga organisasyon nga gipanguluhan sa BAYAN Central Visayas, mag martsa sila padulong sa Colon St. aron ilan mapadayag nga wala sila matagbaw sa pamunuan ni Duterte ug nanawagan usab sila nga mokanaug na kini sa pwesto.
“Sa lima ka tuig ni Presidente Digong sa posisyon, puro palpak ang iyang mga saad ngadto sa mga mamumuo, sama sa pagwagtang sa kontraktwalisasyon ug sa pagpadaghan sa trabaho,” matud pa ni Jaime Paglinawan, chairperson of AMA Sugbo-KMU sa iyang press statement.
Dugang pa ni Paglinawan nga bisan pa sa mga saad nga daghang mga trabaho ang mamugma alang sa mga Pilipino, apan sukwahi ang nahitabo diin matud pa sa pagsurbi sa Social Weather Station, adunay 12 milyones ka Filipino ang walay trabaho.
“Dili ikalimod ang nagkagrabing kalisod nga nasinati sa mga mamumuo ug sa katawhang Pilipino ubos sa rehimeng Duterte,” dugang pa ni Paglinawan.
