By Jim Lloyd Dongiapon
––
Nawad-an og pagsalig gikan sa Grand Imam of Jameo Mindanao Al Islamie (Marawi Grand Mosque) si Senador Robinhood “Robin” Padilla, nga nailhan usab isib “Abdul Aziz” ug ang nag-inusarang Muslim nga senador sa 19th Congress, gumikan sa ginadusong balaod nga magtugot sa same-sex unions dinhi sa nasud.
Sa usa ka sulat sa pagkondena, namahayag si Grand Imam Alim Abdulmajeed Djamla nga siya ug ang iyang mga sumusunod wala na nagasuporta kang Padilla ug ilang kusganong ginakondena ang iyang pag-sponsor sa Senate Bill No. 449, kon “An Act Institutionalizing Civil Unions of Same Sex Couples, Establishing Their Rights and Obligations, and For Other Purposes.”
“This is based on the doctrine that same-sex marriage is considered immoral by all religions ang is forbidded (Haram) under Islamic Law (Subay kini sa doktrina ang same-sex marriage giisip nga imoral sa tanang relihiyon ug ginabawal (Haram) kini ubos sa Balaod Islamiko,” dugang niya.
Nagpadayon si Djamla sa pag-ingon nga kung kinsa man sa mga Muslim ang mubuhat niini, sama ra kini sa dili pagtuo (kufr), nga gawas sa kredo sa Islam.
Apan, nagdumili si Padilla sa pagsukol sa mga reaksyon sa nagkadaiyang grupo sa mga Muslim sa maong balaudnon.
“Sila po ang nakakaalam ng tama at mali sa ating pananampalataya. Kailanman man po hindi ko sasalungatin ang kanilang mga pahayag ng pagtutuwid. Bagkus nagpapasalamat po ako sa kanilang mga paalala at pahayag. Alhamdulillah jazakum allah khayran (Sila ang nakahibalo sa kung unsa ang husto ug unsa ang sayop sa among pagtuo. Dili ko mosupak sa ilang mga pahayag sa pagtul-id. Hinuon, mapasalamaton ko nila tungod niini. Salamat sa Diyos, ug hinaot nga si Allah gantihan ka),” ingon niya sa iyang pamahayag nga gi-post sa iyang official Facebook page niadtong Dominggo, Agosto 14.
Gipadayag usab niya nga ang katuyoan sa maong balaudnon mao ang paghisgot sa mga katungod sa usa ka komunidad, sa kini nga kaso, ang LGBTQIA+ (lesbian, gay, bisexual, transgender, queer/questioning (one’s sexual or gender identity), intersex, and asexual/aromantic/agender) community.
Dugang pa niya, ang maong balaudnon abli alang sa diskusyon ug ang tanang stakeholders makapaambit sa ilang mga sentimento atol sa mga pagdungog.
“Ang lahat ay pantay-pantay. Ang lahat ay may puwang sa ating saligang batas. Ang panukala po na ito ay dadaan sa napakahabang proseso ng pagdinig kaya’t ano man po ang inyong hinaing, mainam po na ihanda ang sarili at inyong organisasyon at makiisa po sa debate sa pagdinig nito (Ang tanan managsama. Ang tanang butang dunay lugar sa atong Batakang. Kini nga sugyot moagi pa sa taas kaayo nga proseso. Mao nang bisan unsa pa ang imong agrabyo, maayo nga i-andam ang inyong mga kaugalingon ug ang inyong organisasyon sa pag-apil sa debate sa pagdungog niini),” dugang niya.
Ang kaminyuon sa Pilipinas kinahanglan tali lamang sa usa ka lalake ug usa ka babaye, sumala sa Family Code. Sa pikas bahin, ang same-sex union bill, mohatag ngadto sa mga LGBTQIA+ couple og parehas nga mga pribilehiyo sama sa mga heterosexual couple, sama sa adoption rights, tax exemptions, labor advantages, property rights, ug mana bisan nga dili sila aktwal nga matawag nga “minyo.”
Nagkanayon ang explanatory note ni Padilla nga kinahanglan mahatag sa mga same-sex couple ang tawhanong katungod ug mga internasyonal nga legal nga katungod. Mipadayon pa siya sa pag-ingon nga bisan wala naghisgot ang 1987 Constitution sa sexual orientation, gender identity, gender expression, o sex characteristics, wala niini ginadili o wala ginaapil ang sibil na panag-uban sa mga magtiayong parehas og sekso.