Nagpadayon nga nagka-ubos ang mga kaso sa COVID-19 sa Central Visayas labi na sa mga siyudad sa Cebu, Mandaue ug Lapu-Lapu, apan nagpabilin nga taas gihapon ang mga kaso niini.
Matud pa ni Department of Health-7 assistant regional director Guy Perez nga sa mga nilabay nga semana makita nga taas ang kaso sa COVID-19 apan nakita karon nga niubos na kini.
Apan bisan pa man sa pag-ubos sa mga kaso sa COVID-19 gi-awhag ni Perez ang mga Cebuanos nga dili gihapon mo kumpyansa ug padayon ang pag implementar sa minimum health protocols sama sa pagsul-ob og facemask, social distancing, paghugas sa kamot ug uban pa.
Base sa datos sa DOH-7 COVID-19 case bulletin pag Setyembre 2, 2021 ang Central Visayas adunay kinatibuk-ang 118,250 ka kaso diin 99,319 ang naka rekober na ug 3,879 ang namatay. Aduna kini 15,052 ka aktibong kaso ug 784 ang bag-ong kaso.
Si Cebu City Councilor ug Cebu City Emergency Operations Center chief implementer Joel Garganera nagkanayon usab nga sulod sa duha na ka semana nagpadayon ang pag-ubos sa mga aktibong kaso sa siyudad.
Matud pa ni Garganera nga ang mga kaso matag adlaw sa siyudad niubos na ngadto sa 100 gikan sa 300.
Dugang pa ni Garganera nga ang average nga mamatay kada adlaw tungod sa COVID-19 ni-ubos na usab gikan sa 14 ngadto sa unom.
Ang Cebu City adunay kinatibuk-ang 38,088 kaso sa COVID-19 diin naay natala nga 33,047 nakarekober ug adunay 1,193 nga namatay. Aduna kini 3,848 ka aktibong kaso ug 141 ang bag-ong kaso base sa Setyembre 2, 2021 nga datos sa DOH-7.