Jim Lloyd Dongiapon
Nakatakdang pangulohan ni Presidente Ferdinand “Bongbong” Marcos Jr. ang opisyal nga groundbreaking ceremony sa Samal Island-Davao City Connector Bridge (SIDC) Project ugmang adlawa, Oktubre 27, sa Damosa Land Properties, Dakbayan sa Davao.
Si Marcos Jr., gilauman nga magpaubos sa time capsule isip senyales sa hingpit nga pagsugod sa pagtukod sa tulay nga mokonekta sa Island Garden City of Samal ug Dakbayan sa Davao human sa upat ka dekada nga paghulat.
Mokuyog kaniya atol sa seremonya ang mga nasudnon ug rehiyonal nga mga opisyal gikan sa Department of Public Works and Highways (DPWH), Department of Tourism (DOT), Department of the Interior and Local Government (DILG), ug Regional Development Council (RDC-XI).
Ang nasangpit nga four-lane bridge project, nga dunay gitas-ong 3.98 kilometros lakip ang mga rampa sa Dakbayan sa Davao ug ang grade road ug rotonda sa Samal Circumferential Road nga 24-metros ang kalapad, gibanabanaang anaa sa PHP23.04 bilyon ang kinatibuk-ang gastos. Gilaraw kining mahuman sa tuig 2027.
Usa lamang ang groundbreaking ceremony sa tulo ka mga kalihokan nga tambongan ni Marcos Jr. sa iyang unang opisyal nga pagbisita sa Dakbayan isip Presidente. Ang laing duha mao ang pagpang-apod-apod og nagkadaiyang ayuda gikan sa gobyerno, nga mapahimuslan sa kapin 500 ka mga marginalized o underprivileged nga mga tawo, ug ang pagbisita sa headquarters sa Eastern Mindanao Command (EastMinCom) sa Panacan, diin siya makighinabi sa mga tropa sa gobyerno.