Walay nay hunong ang buot magpapili isip presidente sa nasud sa pagbisita sa vote-rich Cebu Province, diin ugmang adlawa, Oktubre 28, 2021 gitakda nga mobisita si Senador Manny Pacquiao.
Ang People’s Champ mobisita sa commemorative marker ni Redemptorist priest, Father Rosaleo “Rudy” Romano sa barangay Tisa, Cebu City.
Ang Manny Pacquiao for President Movement (MPPM) ug kanhi Cebu Provincial Board member Ribomafil “Joey Boy” Holganza, Jr, mouban sa senador sa maong aktibidad nga nagtumong sa pagpahinumdum sa mga Filipinos labi na ang mga Cebuanos ang mga kapintasan nga nahimo human gi deklarar ang Martial Law sa panahon ni kanhi Presidente Ferdinand Marcos.
Si Holganza uban sa iyang amahan nga si kanhi Ribomafil “Dodong” Holganza Sr. mga political detainee panahon sa Martial Law uban sa mga Cebuano nga gipangdakop ug gipangpriso sa panahon sa diktaturyang rehimeng Marcos.
Si Father Romano wala naapil sa gidakop apan pag Hunyo 11, 1985, gikidnap siya sa gituohang miyembro sa militar nga nibabag sa motorsiklo nga iyang gisakyan ug gipugos nga gipasakay kini sa ilang sakyanan samtang gitiunan sa may korner sa San Jose ug Katipunan Streets sa Barangay Tisa.
Si Father Romano usa ka kritiko batok sa rehimeng Marcos ug usa ka human rights defender, wala na makit-an human kini gi kidnap ug nahimo na siyang usa ka mga liboan nga mga desaparecido sa nasud.
Sa dili pa ang wreath laying, si Pacquiao makigpulong sa mga opisyales ug miyembro sa MPPM adto sa ilang national headquarters nga naa nahimutang sa Lapu-lapu City, Cebu.
(By: April Therese Tan)