Tulo ka mga pulitikanhong partido sa Cebu City nagkahiusa aron sa pagsiguro nga mapukan ang ilang kontra sa umaabot nga 2022 eleksiyon.
Ang tulo mao ang Kugi Uswag Sugbo o Kusug, Partido Barug ug Partido Panaghiusa nga nagkahiusa aron masiguro ang ilang landslide nga kadaugan batok sa tanang kandidato ubos sa Bando Osmeńa Pundok Kauswagan (BOPK), matud pa Presidential Assistant for the Visayas Secretary Michael Lloyd Dino karong adlawa, Setyembre 23, 2021.
Matud pa ni Dino nga ubos sa hiniusang partido, si acting Cebu City Mayor Michael Rama mao ang modagan pagka mayor ug si incumbent City Councilor Raymund Garcia maoy mahimong running mate ni Rama.
Si kanhi Cebu City Councilor Jose “Joey” Daluz III, kinsa maoy nagbanhaw sa Partido Panaghiusa, usa ka political party nga gitukod sa iyang inahan nga magsisibya sa radyo nga so Nenita “Inday Nita” Daluz, mao ang mahimong campaign manager.
Ang Kusug usa ka political party nga gitukod sa amahan ni Raymund nga si kanhi Cebu City Mayor Alvin Garcia nga gilusad kaniadtong Hunyo 2021.
Samtang ang BARUG, usa usab ka political party nga gitukod ni Rama ug kauban sa PDP-Laban kaniadtong 2018.
Ang tulo ka nagkahiusang partido mo anunsiyo ra sila sa ilang kumpletong line-up sa dili pa ipahigayon ang pagsumitir sa ilang Certificate of Candidacy.
Ang pagsumitir sa COC gitakda sa Commission on Elections karong Oktubre 1 hangtud Oktubre 8, 2021. (By: April Therese Tan)