Onse ka kandidato nga nagtinguha nga mahimong kongresista sa lima ka posisyon para Kongreso sa tulo ka highly urbanized cities sa Cebu.
Sa Mandaue City, si Cebu Sixth District Representative Emmarie “Lolypop” Ouano Dizon modagan nga walay kontra isip kongresista sa Mandaue City Lone District.
Sa nahinumduman, ang Mandaue City nibuwag na sa Sixth District pinaagi sa Republic Act 11257 o “An Act separating the City of Mandaue from the Sixth Legislative District of the Province of Cebu to constitute the Lone Legislative District of the City of Mandaue”.
Ang RA 11257 gipirmahan ni Presidente Rodrigo Duterte ug nahimong balaod pag Abril 5, 2019 nga gipangamahanan ni kanhi Cebu Sixth District Representative Jonas Cortes, ang kasamtangan mayor sa Mandaue City nga buot pagpapili og usab sa maong posisyon.
Kung modaog si Ouano-Dizon sa 2022 nga piniliay, siya ang mahimong pirmerong kongresista sa Mandaue City isip Lone District.
Sa Lapu-Lapu City, lima ang buot magpapili isip kongresista nga kasamtangan gikuptan ni Lapu-Lapu City Lone District Representative Paz Radaza, nga buot magpili isip mayor batok ni Mayor Junard “Ahong” Chan.
Ang lima mao sila Lapu-Lapu City First Lady and chairperson of City Tourism, Cultural and Historical Affairs Commission Cindi King-Chan, Atty. Michael Dignos, Atty. Chieze Demegillo, Atty. Manuel Degolacion ug mediaman Junex Doronio.
Sa Cebu City South District, ang mga kandidato mao sila kanhi Cebu City Mayor Tomas Osmeña ug City Councilor Edu Rama. Ang kongresista karon nga si Rodrigo “Bebot” Abellanosa, wala na kini modagan sa bisan unsa nga posisyon.
Sa Cebu City North District, ang gusto mahimong kongresista mao sila City Councilor Niña Prisca Mabatid, movie actor Richard Yap ug kanhi North District Representative Rachel “Cutie” del Mar.
Si House Speaker Lord Allan Velasco mao karon ang caretaker Cebu City North District sa dihang namatay ning tuiga si Representative Raul del Mar, ang amahan ni Rachel.