Ang tibuok isla sa Cebu nakatala og 5,217 ka bag-ong kaso sa COVID-19 ug adunay 405 ang nitaliwan sugod Septyembre 1 hangtud 12, ning tuiga.
Matud pa sa Department of Health-7 sa ilang matag adlaw nga bulletin sa COVID-19, nga ang Cebu Province maoy labing pinakadaghan og kaso diin naa kini
2,435. Gisundan kini Cebu City, 1,445; Lapu-Lapu City, 762; ug Mandaue City, 575.
Kabahin sa namatay tungod sa maong sakit, matud pa sa maong datos nga ang Cebu Province adunay 305; Cebu City, 57; Mandaue City, 31; ug Lapu-Lapu City, 12.
Nakita usab sa maong datos nga sugod sa pandemya adtong usang tuig hangtud karong adlawa, adunay tutal nga 33,725 nga natakdan sa maong sakit sa Cebu Province, apan 28,024 niini ang naayo na ug 3,822 ang aktibong kaso. Adunay 1,879 nga namatay.
Sa Cebu City, diin gibansagan isip “COVID-19 Capital in the Philippines” adtong usang tuig, aduna kini 39,317 tutal nga kaso apan 34,905 ang naluwas na sa maong sakit ug adunay tutal nga 1,225 ang namatay. Adunay pay aktibong kaso nga 3,187.
Ang Lapu-Lapu City, ang lugar diin nahitabo ang sikat nga Battle of Mactan, adunay aktibong kaso karon nga 1,302. Naa kini tutal nga 12,753 ka kaso apan 11,127 niini ang naluwas apan 324 niini ang nitaliwan na.
Samtang sa Mandaue City, nga inila sa ilang Bibingka ug Masareal, nakatala kini og 10,009 nga nakarekober na sa tutal nga 11,449 nga natakdan sa maong sakit. Aduna usab 344 nga nakabsan sa kinabuhi samtang 1,096 ang nagpabilin nga aktibong kaso.