By: Jim Lloyd Dongiapon
Gikumpirma sa Davao City Police Office (DCPO) nga tulo ka persons under PNP custody (PUPCs) nga nakaikyas gikan sa Sasa Police Station niadtong Huwebes, Hunyo 16, ang nagpabilin gihapong gawasnon.
Ang mga nakaikyas, kinsa pulos mga dunay kalapasan sa Republic Act 9165 kon Comprehensive Dangerous Drugs Act of 2002, ang nailhan nga sila Alan Tilmaria Suluan, Aljun Norbia Lulang, ug Agdokahal Montasi.
Atol sa AFP-PNP Press Corps Southern Mindanao press conference sa Royal Mandaya Hotel sa Davao City karong Miyerkules, June 22, gibutyag ni DCPO Spokesperson Police Major (PMaj.) Maria Teresita Gaspan nga gigabas sa mga piniriso ang rehas sa ilang selda.
Gipaambit usab niya nga gi-relieve gikan sa katungdanan ang Sasa Police Station nga si PMaj. Alberto Abella, gumikan sa maong insidente. Gihulipan siya ni kanhi Marilog Police Station Commander PMaj. Jose Rodrigo Mendoza.
Padayon pang gina-imbestigahan sa Investigation Section sa DCPO ang maong panghitabo. Ang gi-relieve nga station commander ug ang jailer ang ginasuta usab kung adunay mga iregularidad sa ilang bahin.
Posible usab silang pasakaan og administrative liabilities kung mapamatud-an nga dunay kalapasan sa atol sa pagbuhat sa ilang mga katungdanan.
Gi-reassign ang mga nasangpit nga opisyal ngadto sa DCPO ug gipailawom sa ilang pagdumala samtang nagapadayon ang imbestigasyon.
Sa pagsulat niining balita, nagapadayon pa ang hot pursuit operations batok sa mga nakaikyas. Gibutyag usab ni PMaj. Gaspan nga duna na silay nadawat nga advanced intelligence reports labot sa ilang nahimutangan, apan wala na siya naghatag og dugang detalye niini aron usab nga dili makompromiso ang ilang operasyon.
Gipagula usab nila ang mugshots sa mga PUPC nga miikyas alang sa impormasyon sa publiko.