By Jim Lloyd Dongiapon
––
Usa ka grupo sa unom ka mga bata nga nangaligo sa usa ka sapa saPurok 2, Barangay Balengaeng, Tugbok District, Davao City ang nangatanggong gumikan sa kalit nga pagbul-og sa malapokong tubig Martes sa hapon, Hunyo 28.
Gi-post sa Facebook user nga si Dimps Cansana ang mga video sa mga bata nga mitungtong sa usa ka dakong bato nga anaa sa tunga sa sapa nga ilang nahimong dangpanan samtang nagahulat sila nga masalbar gikan sa kusog nga pagbul-og sa tubig.
Gibutyag usab niya sa iyang Facebook post nga lakip ang iyang mga pag-umangkon sa mga natanggong sa flash flood.
Daling miresponde sa panawagan ang mga taong anaa sa duol ug ang rescue team aron luwason ang mga batang nangatanggong.
Gipaambit ni Cansana sa usa ka follow-up post alas 2:50 Martes sa hapon nga malampusong nasalbar ang mga bata ug anaa na sila sa luwas nga kahimtang.
Matud pa sa mga taho nga nadawat sa rescue team, ang kusog nga pag-ulan sa bukid ang hinungdan sa nasangpit nga flash flood karong hapona.