By: Jim Lloyd Dongiapon
Posibleng masilutan ang usa ka magtutudlo gikan sa Daniel R. Aguinaldo National High School sa Dakbayan sa Davao tungod sa iyang mapintas nga komento sa Facebook batok kang Bise Presidente Maria Leonor “Leni” Robredo human nga nagduso og reklamo ang usa sa iyang mga tigasuporta ngadto sa buhatan sa Department of Education (DepEd) Region XI.
Giduso ni Jed Avik ang maong reklamo human nga makita niya kini nga komento sa magtutudlo sa post sa usa ka political blogger:
“18 hours daw siya nag work tapos 6hours lang iyang tulog, sumatotal baho siyag [censored] kay walay ligo-ligo.”
Gikumpirma sa tigpamaba sa DepEd Xi nag si Jenielito “Dodong” Atillo nga nadawat na nila ang pormal nga reklamo ug nakadawat na og mando gikan kang DepEd Undersecretary Revsee Escobedo nga tutukan ang maong isyu.
Ang silot batok sa maong magtutudlo mubase sa resulta sa imbestigasyon.
Taliwala sa nasangpit nga insisdente, gipahimangnuan ni Atillo ang mga magtutudlo nga magbinantayon sa ilang mga gina-post ug gina-share sa social media.
Samtang, gikumpirma usab ni Avik nga nagapaabot siya sa resulta sa pagtuki sa iyang reklamo.
“Hindi natin ito tatantanan. People need to understand that there are consequences to their actions (Dili namo ni pasagdan. Kinahanglan masabtan sa mga tawo nga duna’y sangputanan ang ilang mga binuhatan),” matud ni Avik sa iyang ulahing Facebook post.