By Jim Lloyd Dongiapon
––
Gikumpirma karong adlawa, Hulyo 20 sa Davao City Health Office (CHO), nga usa ka 10 anyos nga lalaking pasyente ang namatay tungod sa severe dehydration ug uban pang mga komplikasyon tungod sa diarrhea.
Gipaambit sa labaw sa CHO nga si Dr. Ashley Lopez sa pakighinabi niini sa city-owned radio station nga gidala ang pasyente sa Southern Philippines Medical Center (SPMC) niadtong Hulyo 16.
Dugang niya, gi-admit ang pasyente ngadto sa intensive care unit (ICU) sanglit nakasinati siya og sintomas sa diarrhea sama sa pagsuka-suka ug loose bowel movement (LBM).
Nasayran usab sa ilang buhatan nga usa ka adlaw sa wala pa magsugod ang mga sintomas, ang pasyente mikaon og street food ug miinom og tubig gikan sa linya sa Davao City Water District (DCWD).
Bisan pa nga nagnegatibo sa Escherichia coli o E. coli bacteria ug total coliform ang water samples nga gisuta sa DCWD, nagpahigayon gihapon og laing water sampling ang CHO, kauban ang Department of Health (DOH) XI ug SPMC. Ang resulta niini laumang ipagawas karong adlawa.
Samtang, gikataho ni Lopez nga misaka na ang mga kumpirmadong kaso sa diarrhea ngadto sa 147, nga labaw pa sa doble kung itandi sa 61 ka mga kaso sa milabayng adlaw (Hulyo 19).
Sa 147 ka mga kaso, 64 ang kasamtangang na-admit sa mga balay tambalanan, 49 ang mga outpatient, ug 34 ang padayon pang ginaberipika.
Ang pinakabatang kaso mao ang usa ka three-month-old nga bata, samtang 69 anyos ang pinakatigulang.
Dugang pa niini, ang kadaghanan sa mga kaso mga babaye, nga naglangkob sa 87 gikan sa 147 ka mga pasyente, kon 59 porsyento.
Nadungagan sab gikan 12 ngadto sa 19 ang ihap sa mga barangay nga dunay kumpirmadong mga kaso. Ang mga barangay ngha nadugang sa listahan mao ang mga Barangay sa Alambre, Bangkas Heights, Daliaon Plantation, Eden, Sirawan, Marapangi, ug Baliok.
Sumala niya, sa mga barangay nga dunay kaso sa diarrhea, ang Daliao ang dunay pinakadaghang mga kaso nga anaa sa 24, ug gisundan kini sa mga Barangay sa Lizada, Lubogan, ug Toril Proper nga dunay tig-14 ka mga kaso.
Mipasalig na og hinabang ngadto sa pamilya sa namatay, ingon man sa uban pang mga naapektuhang mga pasyente, ang City Government of Davao.
Padayon usab nga gina-monitor sa lokal nga panggamhanan ang mga kalambuan kalabot sa nagapadayong outbreak.
Sa laing bahin, ipaubos sa fecalysis ang mga street food vendor sa Toril District sugod karong adlawa, Hulyo 20, ug ipailawom usab sila sa Food Handlers’ Seminar ugma, Hulyo 21, sa Toril Proper Gym.