By Jim Lloyd Dongiapon
Nag-courtesy call si Presidential son William Vincent “Vinny” Marcos, kauban ang Mati Watersports Association (MWA) ug ang United Philippine Surfing Association (UPSA), ngadto kang Mati City, Davao Oriental Mayor Michelle Nakpil-Rabat Lunes sa buntag, Marso 20.
Mikuyog kang Vinny Marcos sila UPSA President George Canlas, UPSA Secretary-General Gino Canlas, MWA President Peter Ocdenaria, ug mga miyembro sa MWA nga sila Jun Plaza, Bayogyog, Panggoy, Upaw Jimenez, ug Gabby Sibala, ug uban pa.
Nakatutok ang panagpulong sa paglusad og national surf leg sa Mati, paglusad og grassroots surfing program, ug ang pagpaugmad ug sertipikasyon sa mga kwalipikadong surf instructor aron magtudlo og surfing.
Makahatag sab kini og gahum ngadto sa mga lokal aron makamugna sila og ilang kaugalingong kultura sa surfing, nga mamahimo sab nilang ipamahin ngadto sa kalibutan.
Dugang pa niini, nahisgutan sab nila Marcos ug Rabat ang mga umaabot nga plano alang sa Mati Airport, pagtukod og skateparks, ug paghinumdom sa nangaging mga kasaysayan tali sa ilang mga pamilya.
Sukad Enero karong tuiga, nagatrabaho si Marcos isip special assistant sa iyang uyoan nga si House Speaker Martin Romualdez.