By Jim Lloyd Dongiapon
––
Gikumpirma karong hapon ni outgoing Davao City Mayor ug incoming Vice President Sara Duterte-Carpio sa iyang sinemanang programa sa radyo nga dili makaadto si outgoing Vice President Leni Robredo sa iyang pagpanumpa karong Dominggo, Hunyo 19, sa Dakbayan sa Davao tungod sa prior commitment.
Matud ni Duterte-Carpio, mutambong si VP Leni sa Naga City Charter Day sa samang weekend.
Samtang, gikumpirma niadtong niaging semana sa Malacañang nga mutambong si outgoing President ug iyang amahan nga si Rodrigo Duterte sa pagpanumpa sa Mayora.
Mutambong sab si Former President ug returning Pampanga 2nd District Representative Gloria Macapagal-Arroyo sa maong kalihokan.
Apan, wala pa nagkumpirma si incoming President Ferdinand “Bongbong” Marcos, Jr. kung mutambong ba kini sa inaugural ceremony sa iyang running mate.
Nagapadayon ang pagpangandam alang sa inauguration weekend, uban sa pagpakaylap og mga pahimangno sa trapiko ngadto sa publiko gumikan sa pagsirado sa mga bahin sa San Pedro ug Bolton Streets ngadto sa trapiko karong Hunyo 18 (Sabado) ug Hunyo 19 (Dominggo).
Magsugod ang programa karong Dominggo sa usa ka Misa Pasalamat sulod sa San Pedro Cathedral alas 3:00 sa hapon. Sundan kini sa pagpanumpa ni Duterte-Carpio kang Supreme Court Associate Justice Ramon Paul Hernando alas 4:30 sa hapon.
Ang Musikahan-Pasasalamat, o ang programang pangkalingawan human sa inagurasyon, ang nakatakda alas 6:00 sa gabii.
Nagpahimangno si Duterte-Carpio ngadto sa mga musalmot sa kalihokan kalabot sa mga ginadiling mga butang atol sa seremonya.
“Ang mga taga-Dabaw medyo familiar na sila ani, pero kihananglan nato ipahinumdom sa mga mutambong nga dili taga-Davao nga ginapagbawal nato ang: sudlanan og tubig, water containers (not transparent), backpacks, ug jackets, ginabawal nato na,” ingon niya.
Dugang pa niini, miingon sab siya nga adunay ipanghantag nga raincoats alang kanila ug galing adunay pagdaut sa panahon.